കുറെ നാളുകളായി ഈയൊരു ദുസ്വപ്നം മലയാളിയെ നിരന്തരം വേട്ടയാടിക്കൊണ്ടിരിക്കുന്നു. ഈ സ്വപ്നത്തില്‍ നിന്നും യാഥാര്ത്യത്തിലേക്കുള്ള ദൂരം വളരെ വളരെ ചെറുതാണ്. കാതോര്‍ത്താല്‍ കേള്‍ക്കാവുന്നത്രയടുത്തു..!
നൂറ്റിപ്പതിനാറു വര്‍ഷം പഴക്കമുള്ളോരു അണക്കെട്ടിനെ കുറിച്ചുള്ള ആശങ്കയാണ് ഓരോ മലയാളിയുടെയും ഉറക്കം കെടുത്തുന്നത്. അണക്കെട്ടിലെ ജലനിരപ്പിന്റെ ഉയര്‍ച്ച താഴ്ചകള്‍ മലയാളികളുടെ നെഞ്ചിടിപ്പിന്റെ വേഗത നിര്‍ണയിക്കുന്നു. ജനങ്ങളുടെ സ്വത്തിനും ജീവനും സംരക്ഷണം നല്‍കേണ്ട ഭരണകൂടമാവട്ടെ, കുംഭകര്‍ണ്ണ സേവയിലും.. സൂപ്പര്‍ ഹിറ്റ്‌ രാഷ്ട്രീയ നാടകം കളിച്ചു കൊണ്ട് കേരളജനതയെ പുളകം കൊള്ളിക്കുന്ന നമ്മുടെ നേതാക്കള്‍ ഭാസ്കരപട്ടേലരുടെ മുന്നിലെ തൊമ്മിയായി മാറുകയാണ് അങ്ങ് ഡല്‍ഹിയില്‍ ... യാതൊരു വിധ സമ്മര്‍ദതന്ത്രമോ സമവായ ശ്രമമോ നടത്താനാവാതെ....
രാഷ്ട്രീയ നേതാക്കളെ, നിങ്ങള്‍ ഓര്‍ക്കുക:
മുല്ലപ്പെരിയാര്‍ തകര്‍ന്നാല്‍, ആ പ്രളയജലത്തില്‍ നിന്നും ആരെങ്കിലുമൊക്കെ അവശേഷിച്ചാല്‍, അവര്‍ തീര്‍ച്ചയായും വിപ്ലവകാരികളായി തന്നെ തീരും. ഒരു കാലത്ത് നിങ്ങള്ക്ക് വേണ്ടി ദിഗന്തം പൊട്ടുമാറുച്ചത്തില്‍ മുദ്രാവാക്യം വിളിച്ചവര്‍, രാപകലുകള്‍ ഇല്ലാതെ നിങ്ങള്ക്ക് വേണ്ടി ചുമരെഴുതുകയും പോസ്റ്ററുകള്‍ ഒട്ടിക്കുകയും ചെയ്തവര്‍, ലാത്തിയടിയേറ്റ് വേദന കൊണ്ട് പുളയുമ്പോഴും നിങ്ങളുടെ പ്രത്യയശാസ്ത്രത്തെ നെഞ്ചോടടുക്കി പിടിച്ചവര്‍..
സിരകളില്‍ വിപ്ലവരക്തവുമായി, മനസ്സില്‍ അണയാത്ത അഗ്നിയുമായി അവര്‍ വരും.. വന്നു ചോദിക്കും...
ഒരു ജനതയെ നിങ്ങള്‍ എത്രനാള്‍ ജീവിതത്തിനും മരണത്തിനുമിടക്ക് തട്ടികളിച്ചു?
ജീവന് വേണ്ടി മാത്രം ആബാലവൃദ്ധം കേണപേക്ഷിച്ചിട്ടും നിങ്ങളെന്തു കൊണ്ട് ചെവി കൊണ്ടില്ല? ഞങ്ങളുടെ തേങ്ങലുകള്‍, നിലവിളികള്‍, പ്രതിഷേധ പ്രകടനങ്ങള്‍ എന്തു കൊണ്ട് നിങ്ങള്‍ വെറും പ്രഹസനമായി മാത്രം കണ്ടു? ജനാധിപത്യത്തില്‍ വിശ്വാസിച്ചതാണോ ഞങ്ങള്‍ക്ക് പറ്റിയ തെറ്റ്? ഉത്തരം പറയേണ്ടത് നിങ്ങള്‍ മാത്രമാണ്.
ജനങ്ങളുടെ സ്വത്തിനും ജീവനും സംരക്ഷണം നല്‍കേണ്ടവര്‍.. നാടിനെയും നാട്ടുകാരെയും പുരോഗതിയിലേക്ക് നയിക്കേണ്ടവര്‍.. ചോദ്യങ്ങളില്‍ നിന്നും ഒഴിഞ്ഞു മാറുവാന്‍ നിങ്ങള്‍ക്കാവില്ല. വോട്ട് ബാങ്ക് സംരക്ഷണമോ പ്രത്യയശാസ്ത്ര സംഘട്ടനങ്ങളോ അല്ല മുല്ലപ്പെരിയാറില്‍ വേണ്ടത്.
ഒന്നോര്‍ക്കണം:
ജനങ്ങള്‍ ഉണ്ടെങ്കിലെ ജനാധിപത്യമുള്ളൂ... അധികാരമുണ്ടാകൂ... അധികാര കസേരകളും..
അധികാരത്തിന്റെ മണിമാളികകളില്‍ നിന്നും ഒന്നുമില്ലായ്മയുടെ തെരുവോരങ്ങളിലേക്കുള്ള ദൂരവും വളരെ ചെറുതാണ്. കൈയെത്തിച്ചാല്‍ തൊടാവുന്നത്രയടുത്തു...!
ഇതെഴുതുമ്പോള്‍ മുല്ലപ്പെരിയാറില്‍ നൂറ്റിമുപ്പതിയാറരയടി വെള്ളം ഉയര്‍ന്നിരിക്കുന്നു. ഭൂമി ചെറുതായൊന്നു പിടച്ചാല്‍, എന്തെങ്കിലുമൊന്നു സംഭവിച്ചാല്‍ ഈ മഹാ പ്രളയത്തില്‍ നിന്നും നമ്മെ രക്ഷിക്കാന്‍ ഗോവര്ധനഗിരി ചെറു വിരലിലേന്തി ഭഗവാന്‍ കൃഷ്ണന്‍ അവതരിക്കുമെന്നും സര്‍വ ചരാചരങ്ങളെയും ഉള്‍കൊള്ളുന്ന പെട്ടകവുമായി നോഹ വരുമെന്നും നമുക്ക് പ്രത്യാശിക്കാം..
4 comments:
പുര കത്തുന്നു, എന്നാല്‍ ശെരി ഒരു വാഴ വെട്ടിക്കളയാം! മുല്ലപ്പെരിയാര്‍ പൊട്ടിയാല്‍ കുറെ മലയാളികള്‍ വെള്ളം കുടിച്ചു ചാവും അത്രയും തന്നെ തമിഴന്മാര്‍ വെള്ളം കിട്ടാതെയും ചാവും. പിന്നെ why this kolaveri?
The cocluding part is touching. Couldn’t stop me reading it twice!!
Very well-written! Thought provoking, poignant and touching! Keep writing! :)
Post a Comment